كمال اجسام وتجارب اللاعبين وازاي تنجح في هذه اللعبه الرائعه وتحقق هدفك

[Asmer]

اراااء لاعبيها 

انا عن نفسي بعشق حاجه اسمها كمال اجسام اللعبه دي لو ثقتك في نفسك صفر مع تعبك وجهدك ثقتك في نفسك هتبقي 100% 

بحب اللعبه دي عشان ليا هدف فيها ولازم احققه

اللعبه دي بتخلي الانسان يخرج عن الروتين الطبيعي

بتخليك تجرب حاجه جديده

تتحدي نفسك ف كل مره بتشيل وزن جديد وتتخيل نفسك بتقضي عليه

تجربه رقم 1 

الحقيقة انا اصلا كنت لاعب سباحة من صغري
و لما انتقلت لكمال الاجسام كان لعدة اسباب كتيرة جدا
منها قرب المكان او الجيم من البيت و انك سيد نفسك في الوقت اللى تنزل فيه
مش متقيد بمدرب او فريق
و اخيرا والاهم انا حبيت اللعبة دى جدا بصورة لا توصف و ساعدني تخصصي و دراستي
و الاستزادة من المعلومات هنا بالمنتدى و المواقع الاجنبية الى جانب ذلك في ان اتطور في اللعبة
و افهمها بصورة اكبر و احبها اكثر و اكثر
احببتها ايضا لان اللعبة تحافظ على الصحة و تقويها بصورة عامة و تجعل الجسد في صورة افضل
و اقوي .. لا اهتم بالضخامة و الاحجام السوبر كومبو
لانى اصلا بطبيعتى لست ضخما بالاساس
احب ان ارى دائما نفسي امام المرأة و اجد في نفسي كل فترة نتيجة تعبي و مجهودي يظهر تاثيره
الايجابي على جسمي و علي ذاتيا
تعرفت في اللعبة و هنا بالمنتدى على كثير من الناس المحترمين و كذلك في الجيم طبعا
بقضي وقت بنفصل فيه عن العالم و بفكر فقط في الحديد و اللعب بس
و اروح اخد الدش الدافي ................ يا سلالالالام
و تانى يوم تبقى مشاكل الحياة و ضغوطها تانى و الجيم بالنسبالى مكان بنفصل فيه عن الحياة المتعبة
و تعب حمل اثقال الجيم و مجهوده اهون بكتير من تعب و مشاغل الحياة

تجربه رقم 2

انا زى ناس كتير مش عارف بحب اللعبة دى لية انا ادمنتها حتى فى يوم الرحة بتاعى من التمرين انا بريح يومين بروح اعد فى الصالة اصبحت عادة عندى سواء لعبت او ملعبتش بحس براحة نفسية جدا وانا جوة الصالة لازم اسمع صوت الدمبل وهو بيتهبد على الارض وكابتن الصالة زى كل يوم يقول ياكباتن العبو براحة غير كد لو انت عايز تعرف حبنا للعبة دى بجد لان هيا مفيدة للجسم زى باقى ارياضات طيب اشمعنى دى علشان ممكن تلعبها فى اى وقت وغير كدة انت كل يوم وانت رايح التمرين بيكون الدافع من جواك انت مش زى اى رياضة فى ضغط من الكابتن بتاعك لا انت اللى بيكون عندك الدافع انك كل يوم تحقق هدف معين ودة بيخلى عندك راحة نفسية وكمان ضغط اليوم كلة سواء شغل او غيرة بيروح بيتعملك رى فرش كانك بتبتدى يوم جديد والصحبة داخل الصالة بردة وغير دة اكيد معظمنا عندة عيوب فى جسمة اللى رفيع واللى تخييييين هههه واللى جسمة كنز وغيرة كل دة يصلح لاى حد انو يلعبها وبتخلى المنظر العام للجسد كويس حسب رغبة صاحبة ودة بيخلى عند الواحد فضول لمعلافة كل حاجة عن التمارين يعنى اللى عايز يضخم واللى عاز يخس وغير بردة الللعبة دى من وجة نظرى المتواضعة بتقوى جميع اعضاء الجسم من مناعة لقلب لغيرة

تجربه رقم 3

انا بقى زمان قبل الجيم كنت رفيع جدا لدرجه اصحابى كانوا بيتريقوا عليا و يقولولى صدرك لازق فى ظهرك

المهم روحنا الجيم كلنا مع بعض و كانوا مش بيبطلوا تريقه لا على ظهرى ولا على صدرى لانى اصلا مش عريض فا تحس ان كان جسمى كله قد دراع جون سينا مثلا

هم بطلو جيم و انا حبى بدأ اول اما شوفت تحديدات العضلات بتظهر عندى فا كملت لمدة سنتين من اللعب كانت التريقه لسه موجوده على النقط الضعيفه فى جسمى يعنى صدرى او رجلى و هكذا فا بقيت اركز اوووووووى على المناطق دى

و كان ظهرى عقدة حياتى الحمدلله دلوقتى افضل عضله عندى هيا الظهر و الدراع كامل بالكتف

بعد 4 سنين من اللعب بقيت اواجهه صعوبه فى اللبس مش بعرف البس اى حاجه زى الاول بس ده كان بيخلينى مبسوط اووى ان كنت ااااااى حاجه البسها كانت زى ماتقول كده معموله لشريف

و بعد 6 سنين من اللعب اللى هو حاليا بقى اصحابى دول طبعا مالهومش عين يتريقوا تانى بس بيقولوا عليا كلام منشطات و مش عارف بيضرب ايه و ايه و ايه و لما انا اعمل عبيط الاقى كل واحد فيهم جالى على جنب و بيقولى عايز اجى معاك الجيم :d:d:d و يفضل يسألنى انا باخد مكملات ايه علشان يبقى زيى

وعملت الحمدلله صداقات كتيير اوى فى الجيم و بحمد الله الحمدلله الجيم مالوش لازمه لو شريف مش هناك
و يبقى الكابتن واقف جنبى و الاقى شباب بتيجى تقولى كابتن شريف ادينى تمرينه العبها النهارده و ناس ماعرفهاش والله

كل ده بيزود حبى للعبه و حب الناس ليا الحمدلله ده غير نظرت الناس ليا فى الشوارع تحس انى مخلوق غير البنى ادمين مش تبع كوكب الارض مثلا هههههههههههههههههه و افضل اقول فى سرى قل اعوذ برب الفلق

اسف على الاطاله بس ماصدقت احكى بصراحه و دى كمان انا مختصر مش كفاحى كامله زى ما عمل رجائى كده
اى خدمه يا عم رجائى عاملك حس انا هنا ها :d

اه حاجه كمان معلش لما ببقى ماشى فى الشارع و انا رايح الجيم و وانا جى من الجيم فيه واحده واقفه فى محل موبايلات جنب البيت بتاعى و فى الوقت اللى انا رايح فيه الجيم و وانا راجع من الجيم الاقيها واقفه بره المحل بتتفرج عليا تحس انى بعمل عرض موسيقى ولا حاجه :d:d و لما باجى اشترى كارت مثلا من عندها تفضل تضحك زى مايكون بلياتشو واقف قدامها هههههههههمش عارف اعمل معاها ايه بقى

تجربيه رقم 4

أول حاجة ظبطتلي جسمي كتييير جدا و لأنها أسلوب حياة كامل أفضل مش مجرد وقت تمرين و خلاص و أحسن ناس عرفتها هي الناس إللي في الجيم و دي فعلا أكتر حاجة حببتني في اللعبة

تجربيه رقم 5


انا لعبت كمال اجسام لانى عايز اثبت لنفسى انى ناجح فى حاجة واخرج من عقدة الفشل
دبلوم صنايع بقى والبخت ضايع
لعبت 6شهور وحبيت اللعبة لدرجة فوق الوصف
كنت بادئ رفيع جدا 65كيلو 195سم ولك ان تتخيل المنظر لكن بحمد الله وصلت ل74كيلو وطبعا الباور زاد اوى عن الماضى
لكن سرعان ما اصيبت بالاحباط الشديد لوجود لاعبين ياخدوا منشطات مهو اصل الجيم بتاعنا طالع منه اول الجمهورية سن 18سنة للعام السابق والشلة بتاعته فبطلت 6شهور روحت لعبت فيهم بوكس بس لقيتها لعبة مش مجزية بالنشبة للضرب اللى بناكله فرجعت كمال اجسام بعد ما رجعت 65كيلو تانى يعنى ابدا من الصفر لكن عندى العضلات متحدده لانى من الخامات اللى دهونها قليلة اوى يعنى زيادتها بطيئة اوى ودى الخامة اللى بسميها الرزلة

تجربه رقم 6


انا حبيت اللعبه دي من صغري وانا 18 سنه وبدأت امارسها ...لاني كنت معجب بلاعيبه كمال الاجسام زي كيفن ليفرون وفيلكس ويلر ...وكنت باشتري مجله عالم الرياضه ايام زمان واقعد اقرا فيها بالساعات...
وواحده واحده بدأت اضبط لحد دلوقتي وانا عندي 22 سنه ووصلت لمستوي كويس والحمد لله ووزني 75كيلو او اقل سنه ههههههه .
ونفسي ان مفيش حاجه تمنعني وابطل لعب ...


تجربه رقم 7


احب رياضة كمال الاجسام لانها بإختصار:..........رياضة الرجال الشداد اصحاب الإرادة القوية والاصرار والمصابرة وانا ببساطة صاحب اصرار وإرادة قوية ومصابرة هذا من فضل ربىوبالتالى فهى رياضة متماشية مع شخصيتى بغض النظر عن تكوين جسمى وحجمة



تجربه رقم 8


بص يا سيدي بالنسبة ليا
من الناحية العلمية كمال الاجسام هى الشيء الوحيد الذلا لا يمكن فصله عن اى شيء بيتم خلال العمل اليومي
الرسول صلي الله عليه وسلم قال صوموا تصحوا(حط تحت كلمة تصحوا 100 خط)
الهدف من ان الانسان يكون صحيح البدن هو انه بيادي نشاطه وعمله باكبر كفاءة وبدون الشعور بالتعب والارهاق والخمول المستمر
ثانيا ارضاء لله لانها بتلهيك عن الشهوات وبتمنعك عن حاجات كتير زى التدخين وشرب الكحولات وهتخليك ملتزم بنظام غذائي معين واسلوب حياة متفق تماما مع الفطرة اللى ربنا خلقنا عليها وده من الناحية الروحانية
من الناحية النفسية لو الواحد شكل جسمه مش حلو هيكتئب والاكتئاب سيد الامراض ومفتاح الجسم لاى مرض
كذلك انا عمرى ما حسيت انى بقدر اركز او اذاكر غير لما بدات انتظم بالتدريب بجانب الدراسة وحتى دلوقتي وانا بشتغل
ايضا بتعلم الصبر وده اهم عامل من عوامل النجاح
واسباب تانية كتير مش فى دماغي اجابة محددة ليها دلوقتي
فى امان الله


تجربه رقم 9


انا خلقت لاكون لاعب كمال جسام
مش لاعب بس لا بطل من ابطال اللعبه دي ههههه
والله من صغري وانا عندي 5 سنين كنت لما اشوف
مصارعه او اي لعبه فيها قوه اسرح واتأمل فيها
كنت من وانا في ابتدائي ارجع البيت بعد المدرسه
اعد العب ضعط وعقله ومكنتش احب حد يشوفني وانا بلعب
كنت احوش من مصروف المدرسه ايام زمان ومجبش بيه اي حاجه
لمده اسبوع اتنين عشان اشتري دمبل او عقله ..وكنت ساعات لما
اروح الصيدليه اشوف علبه مكتوب عليها بيج استرونج ومره فتحتها
واخدت منها حبيتين ههههه وطلعوا فالاخر مش للعضلات لحاجه تاني
..كنت لما ابص لصوره اي لعب احس انه لحاجه دي تبعي رياضتي انا وعايز يكلمني
ببساطه اقدر اقول اني خلقت لاجل هذه اللعبه


تجربه رقم 9


بص ياغالي انا من زمان وانا بحب الرياضه بصفه عامه وخصوصاً كرة القدم اتعرفت على كمال الأجسام من صغري وبدأت أحتك بيها مره في التانيه وفالتاليته لغاية مابتديت اقرأ عن فوائدها وان هي اكبر من مجرد عضلات وبس لدرجة اني بقيت ابطل اروح العب كوره بسبب اللعبه .. وغير دكهانا بعتبرها أم الرياضات زي الجري مفيش رياضه بتللع زي كرة القدم - تنس - كونغفو .. الخ الا وتلاقي كمال الأجسام من المكملات للعبه الأخرى .. وممكن تلاقي الرياضات الأخرى ترويح عن النفس ورياضه طبعاً لكن ممكن تلاقي نفسك مصاب بسهوله وتتعرض لخشونة الركبه زي كرة القدم مثلاً أما كمال الأجسام بلاقيها بتفيد وبستفيد منها من أكتر من ناحيه جسمياً - صحيّاً - نفسيّاً - وبتنمّي جسمك كمال الأجسام أو الرياضه بصفه عامه نعمه المهم نستغلها صح فيما يرضي الله عزَّ وجل والحمد لله على هذه النِّعمه .. جزاك الله خيراً يا محمد

[B I G]

تجارب جميله جدا ومحمسه جدااا الف الف شكر علي الموضووع الجميل دا ويا ريت كلنا نفضل نفيد بعض
كمال اجسام وتجارب اللاعبين وازاي تنجح في هذه اللعبه الرائعه وتحقق هدفك

[Asmer]

الف شكر اخويا علي ردك الجميل
ان شاء الله في افضل