كسر وتخطي مرحلة البلاتوة والتعرف عليها

من طرف Mony khaled الأحد يونيو 15, 2014 2:37 am

السلام عليكم ورحمة الله وبركاته

كيف حالكم يا شباب

اليوم ان شاء الله هنتكلم عن موضوع تقريبا منتشر في كل صالات مصر والوطن العربي

لما بتدخل صالة تلاقي واحد بسم الله ماشاء الله جسمع فارد وطالعله جانحات وبكرش

وتيجي تبص عليه وهو بيرفع على الصدر تلاقيه بيرفع ممكن ازيد منك بــ 10 كيلو

يعني صعب نلاقي واحد بيرفع الــ 150 والــ 190 اللي بنشوفها بره

وتيجي تسأله بتلعب قد ايه وانت منبهر طبعا لان كده كده بيرفع اكتر منك وجسمه احسن منك

يقولك تلات او اربع سنين

والمصيبة ساعتها انك تلاقي نفسك بنيت حلمك ان توصل للوزن ده في اقل من فترته يعني حوالي سنتين هههههههههه

ودي في حد ذاتها مصيبة

انا مش بحب الرغي الكتير عشان متزهقوش بس الفكرة ان زيادة اوزانك في اول لعبك شيء طبيعي وسهل هل سألت نفسك انت بقالك قد ايه مخرجتش من الوزن العجيب اللي انت رابط عنده ده ؟

هي دي مرحلة البلاتوه انك خلاص مش عارف تكسر الوزن اللي انت بتلعب بيه وكل ما تحاول ترجع تاني لنفس الوزن الاخير

تعالوا كده واحدة واحدة نشوف نتغلب على الموضوع ده ازاي

في شوية خطوات كده هنتكلم باختصار عن كل واحدة وهنيجي عند اهم حاجة ونفسر فيها براحتنا :

الاولى : التغذية

طبعا التغذية دي من اساسيات اللعبة وكلنا عارفين كده

كل واحد فينا في بداية تمرينه كان واخد على نظام غذائي معين واول ما لعب جسمه بدأ يتعامل مع معادلة الخارج والداخل انت بتاكل وفي سعرات حرارية بتتحرق في التمرين وطبعا في بداية تمرينك المجهود اللي انت بتعمله بيكون تحت خط الداخل

المشكلة بقى انك توصل لمرحلة انك بتاكل نفس كمية الاكل اللي كنت بتاكلها وانت بتشيل العشرين كيلو على الصدر

عاوز تشيل عليه 80 ازاي ؟

يبقى اكيد محتاج تعدل نظام تعذية وتعمل رجيم جديد بناءا على المكتسب العضلي الجديد والجسم والمجهود الجديد

الثاني : الراحة

برده من اساسيات اللعبة وبرده كلنا عارفين كده

بس احنا المشكلة ان احنا بنلعب من غير تفكير يعني انا هتكلم عن نفسي انا كنت بلعب وحافظ القواعد تمرين اكل راحة ونوم من 7 لــ 9 ساعات و و و و

والكلام اللي كلنا عارفينه

بس لما جيت ببص على نفسي لاقيت نفسي بنام 6 ساعات بس في اليوم

ودي مش مشكلة , دي مصيبة واكتشفت كده بعد فترة بعد ما بدأت اركز في الموضوع انا بنام قد ايه

فلازم الجسم ياخد راحته العضلة تزيد تقوم ترفع اكتر وبالتالي كسرت وزنك وعديت المرحلة بتاعت ثبات الوزن

الثالث : المكملات

ودي خطوة قبل اخيرة

طبعا احيانا البعض منا خلاص عرف الواي بروتين جولد من اوبتيموم والكرياتين من برولاب والان او من بي اسن ان

وخلاص جربهم وفعلا جاب معاه النتيجة الصح

فخلاص رشق فيهم وحالف ما يسبهم لا ده انا هقولك على حاجة حلوة

اعمل حاجة اسمه دورية المكملات يعني غير في الشركات بتاعتك كل ست او تمن اسابيع غير البروتين والكرياتين ومنتج الباور اللي جنب الكرياتين ولو في محفزات غير الشركة وبكده عمر جسمك ما هيتعود على حاجة وتبقى بالنسبة له عادي

مشكلة تانية بسيطة ان احنا مصريين وكلنا زي بعض بنلعب عادي مش محترفين ولا حتى هواه

يعني من الاخر المصاريف هتكون تقيلة

اقولك على حاجة ؟ ادي جسمك الفرصة

يعني ايه ؟

يعني من الاخر كده وقف كل مكملاتك فترة شهر وكل كويس وادي الاكل فرصة وثق في اكلك

جسمك هينظم نفسه على المعدلات الجديدة ساعتها خد المكملات تاني ومن ضمنهم مكملات الباور

وتبقى انت كده ظبط الدنيا جسمك عمره ما هياخد على المكملات ويتعامل معاها على انه شيء عادي

الرابع : التمرين

اهم حاجة في كل اللي فات

غير

يعني ايه اغير

يعني غير التمرين

غير الاستايل

غير العدات

غير عد المجاميع

غير الجدول

غير ايام الراحة

غير وقت التمرين

غير الصالة لو في امكانيات في صالة تانية

كده هتخلي جسمك دايما في حالة تخمين وعمره ما هيتعود على نوع معين

طبعا يجي حد يقولي طب فيدنا يا فقيق ايه غير غير غير ومفيش جديد

بص في موضوع من المواضيع الجميلة اوي بتاع الكوتش baher_bop

افضل 16 تقنيه متقدمه لبناء وتعظيم القوة والكثافة العضلية

غير فيهم اسبوع كل ست اسابيع

موضوع تاني بتاع المسابقة اللي فاتت

برنامج ال10 تمارين في ال10 تكرارات

اقولك انا بقى على كام حاجة تانية تساعدك :

1- بدل مجاميعك بعداتك

ازاي ؟

يعني لو بتلعب ضغط على الصدر اربع مجاميع في عشر عدات

اقلبه والعب عشر مجاميع في اربع عدات

2- زود عداتك وقلل الراحة بين المجاميع

3- يوم ما تيجي تكسر الوزن العب عدات 5 بس وزود كل شوي لحد ما توصل للوزن بتاعك وزيد على خمسة باوند بس مش اكتر والعب خمس عدات برده بس وخلي معاك حد

4- خلي نظام تمرينك عالي الحدة واعرف انك مش رايح تهزر او تدردش لان دول ليهم وقتهم بره الصالة

5-طول مانت خايف من الوزن عمرك ما هتشيله لو رفعه معاك جاي كتلر كاسبوتر معاك

انا لسة فاكر اول مرة رفعت فيها الدانبل الاربعين في تمرينة ضغط الصدر شيلته غلط حتى كنت بقول هو تقل ليه كده

عديت اربعة ومقدرتش ولما خلص لاقيت ابن خالي ( نصي التاني في الجيم ) جاي جري بيقولي انت شيلته ازاي ده ؟ فبقوله هو ايه يابني انا معرفتش اكمل بيه مش عارف مالي واكتشفت بعد كده اني شيلت الاربعين ههههههههههههههههه

فهي كلها عوامل نفسة محتلة جانب كبير من الموضوع

6- ركز وانت بترفع زيادة وخلي زيادتك طفيفة عشان تقدر تشيل كويس

7- حافظ على الفورمة لانها اهم من الوزن من غير فورمة

8- سخن كويس اوي قبل ما تكسر اوزانك وعموما في التمرين

وفي الاخر عاوز اقولك على

الرجل , الرجل , الرجل

العب سكوات , العب سكوات , العب سكوات

ولما تخلص

العب شوية زيادة

وشوف الفرق اللي هتعمله معاك

واشوفكوا الاسبوع الجاي على خير

كسر وتخطي مرحلة البلاتوة والتعرف عليها Do

كسر وتخطي مرحلة البلاتوة والتعرف عليها Do