كيفيه التعامل مع الكلب...!!!

من طرف 3amer الأحد يونيو 15, 2014 10:02 pm

في الجزء ده يا شباب هناقش معاكم اهم النقاط في تعامل الكلب مع الاطفال و العكس. والموضوع ده بالذات حساس جدا ولازم يتخذ الحذر فيه تماما علشان نمنع اي حوادث قبل وقوعها. وأقصد بكلمة طفل المرحلة العمريه من سنتين الى 8 سنوات، لأن قبل كده الطفل بيكون رضيع وأكيد لازم نبعد الكلب عنه أو يكون الكلب تحت المراقبه مهما كان منعا لحدوث اي حوادث خطيرة. وبعد سن 8 سنوات الطفل بيكون كبر ونوعا ما اتكون لديه نوع من الوعي و الادراك وممكن يتعامل مع الكلب بصورة شبه سليمه مع بعض توجيهات الآباء طبعا.

ولسهولة مناقشة الموضوع هناقشه من محورين اساسيين، الاول لو انت جايب الكلب جرو صغير زي ما سبق و اتكلمنا، والتاني لو الكلب كبير (طبعا دي مهمة في حالة ان عندك كلب اساسا وربنا رزقك بأول طفل).

1- اقتناء جرو صغير في وجود أطفال:
طبعا دي أفضل حالة ممكن نقتني فيها جرو وهي وجود أطفال صغيرين، وذلك لسهولة تعريف الأطفال على الجرو، وفي نفس الوقت الجرو هينشأ مع الأطفال في بيئة واحدة وهيعتبرهم أصحابه، ده غير استمتاعه باللعب معاهم وكمان الجرو بكل سهولة هيتعود على ماهو صواب وما هو خطأ في علاقته بالأطفال.

ونيجي بقى لأول حاجة وهي بداية تعارف الطفل و الجرو. في البداية لازم يكون في مراقبة صارمه من الآباء للأطفال اثناء تعاملهم مع الجرو، لأن الطفل بطبعه فضولي وبيبني بالفضول ده قاعدة بيانات لكل ما هو محيط بيه، وكذلك الجرو. وعلشان كده في الشهور الأولى لازم نفهم الأطفال انهم يتعاملوا مع الجرو بحنان و هدوء، وعدم ايذاء الجرو بأي شكل من الأشكال، زي مثلا شد ذيل الجرو أو ضربه بعنف، لان الأمور دي خطيرة. هي مش هتعمل اي سوء في العلاقة بين الاتنين لكن هتخلي الجرو غبي في التعامل مع الأطفال لأنه بالتأكيد هيتخيل ان دي طريقة التعامل الطبيعية، وطبعا هيكبر الجرو وقوته هتزيد وهيفضل فاهم ان اللعب و الهزار يكون بالعنف وده بالتأكيد هيأذي الأطفال.

فأهم حاجة ننبه عليها هي عدم ايذاء الجرو، ودايما نشجع الألعاب اللطيفه مع الجراء، زي مثلا لعبة retrieve ودي من أفضل الألعاب وبتنمي قدرات الجرو بسرعة، كمان بتعمق العلاقة بين الجرو و الطفل وطبعا مفيدة جدا لصحة الجرو و الطفل معا.
اضغط هنا لمشاهدة الصورة بالحجم الطبيعي.

كمان مهم جدا اننا نشرك الكلب في اللعب مع الأطفال أطول فترة ممكنة، لأن الجرو بيعتبر نفسه أحد أفراد الأسرة ولما بيشوف الأطفال بتلعب بيكون نفسه هو كمان يلعب معاهم، وحرمانه من اللعب بيولد جواه كره للطفل ممكن ينقلب لغيرة شديده مدمرة لما يكبر وده طبعا غير مطلوب بالمرة.
يفضل كمان ان مواعيد أكل الجرو تكون في وقت أكل الأطفال، وده علشان الجرو يتعود ان الكل بياكل في وقت واحد، وكمان دي بتبني حاجز الاحترام بينه وبين الآباء، يعني الجرو حيفهم انه زي الأطفال، بياكل في وقتهم وبيلعب معاهم، وبالتالي الآباء ليهم وضع خاص وده هينمي احترامه ليهم وكمان هيقرب بينه وبين الأطفال جدا.

طبعا لازم ننبه على الأطفال عدم شد ذيل الكلب، وعدم اللعب في الأذن، ولازم ننتبه للسقوط، لان ممكن أثناء اللعب الطفل يقع على الجرو وده أكيد هيسبب أذى كبير ليه خصوصا ان عظامه بتكون لينة جدا. ومن الأمور المهمة كمان اثناء فترات اللعب اننا نلاحظ نوعية الألعاب اللي الأطفال بتلعب بيها علشان ميكونش فيها اي قطع صغيرة ممكن الكلب يبلعها وتسبب له مشاكل.
ولما الكلب يوصل عمره لسنتين هنا بقى لازم نعمل فرق بين الكلب وبين الطفل، لأن الكلب بيكون وصل لمرحلة الشباب، ولازم يشعر بشخصيته الجديدة.

وهنا بنبدأ نبعد الأطفال عن الكلب في فترات التمرين بتاعته، والنزهات المقصود منها التدريب بتتم بعيد عن الأطفال علشان الكلب يشعر بالمسؤولية وبأن ده شغل مش لعب، وكمان لو الكلب عمل اي حاجة خطأ لازم العقاب يكون بعيد عن الأطفال، ونفس الموضوع للأطفال، لو طفل أخطأ نراعي اثناء عقاب الطفل ان الكلب يحس العقاب ده مش ليه انما هو للطفل فقط علشان الكلب يحس بشخصيته وبأنه خلاص تجاوز مرحلة الطفوله وانه مسؤول عن الأطفال.

2- اقتناء كلب كبير مع وجود طفل:
تاني محور وهو لو جالك كلب كبير وانت عندك أطفال. هنا بقى هنواجه مشكلة اساسية وهي تعريف الكلب على الطفل في البداية، وطبعا دي بتاخد وقت شويه. ولحل المشلكة دي بنتبع اسلوب جميل جدا وهو توليد الرغبة المعاكسة في الكلب. بمعنى تاني اننا نخلي الكلب هو اللي نفسه يتعرف على الطفل وهو اللي يسعى لكسب وده، وهي طريقة طويله شويه في تنفيذها بس نتيجتها ممتازة.

بنبدأ في الأول نخلي الكلب يشوف الأطفال وهم بيلعبوا بدون ما نسمح له باللعب معاهم لمدة اسبوع مثلا، وخلال الوقت ده هتبدأ الرغبة تتولد داخل الكلب لحبه في اللعب، وهيكون عايز يلعب معاهم بأي شكل. وأول ما نلاقي الكلب بينبح ويهز ديله وهو شايف الأطفال بتلعب نخلي الطفل يقرب من الكلب بهدوء وهو مبتسم طبعا، ويحط في ايده اي حاجة بيحبها الكلب زي قطعة لانشون مثلا، ويقرب بهدوء من فم الكلب من تحت ويخلي الكلب ياخدها منه. دي أول مكافئه من الطفل للكلب وصدقوني ليها تأثير رهيب على الكلب أكتر من ان الطفل يحاول يتودد للكلب بأنه يمسح على راسه أو ضهره. وكمان بلاش ابدا تكون بداية العلاقة ان الطفل يحاول يحط ايده على راس الكلب لأن الحركة دي بتستفز المشاعر العدوانيه عند الكلب.

أول ما الكلب ياخد المكافئه من ايد الطفل نخلي الطفل يداعب المنطقة تحت ذقن الكلب و عند الرقبة من تحت وهو بيقول للكلب كلام مشجع، وهنا هتبتدي الثقه تتولد بين الاتنين، وساعتها نسمح للكلب باللعب مع الأطفال، طبعا تحت المراقبه ولفتره مش طويله يعني بالكتير ربع ساعه، وأهم حاجة ان الأطفال تحسس الكلب السعادة للعبه معاهم وانهم مش خايفين منه ابدا، وبعدين ناخد الكلب بعيد عنهم ونكافئه بوجبة طعام شهية ويفضل تكون مختلفه عن الوجبة المعتادة علشان يحس انها مكافئه.
بكده نكون حفزنا الكلب للعب مع الأطفال، وهنلاقيه اول ما يسمع صوتهم وهم بيلعبوا بيكون عايز بلعب معاهم باي شكل، وتدريجيا هنلاقي الثقه اتولدت تماما بين الكلب و الطفل بدون مشاكل.

واهم حاجة في اول اسبوعين، اننا نلاحظ تصرفات الكلب مع الأطفال، ونقوم اي سلوك فيه خطورة على الطفل. يعني مثلا لو الكلب حاول يعض طفل على طول نديله أمر التوقف وناخده ونمنعه من اللعب فتره لا تزيد عن 10 دقائق ويكون في نفس الوقت شايف الأطفال بتلعب علشان الحافز يكون موجود. بكده حيفهم ان اي سلوك خاطئ معناه الحرمان من اللعب.ومع الوقت كل العادات الغير مرغوب فيها حتنتهي والكلب حيحب الاطفال جدا وهيشعر بالمسؤولية تجاههم وهيكون أفضل رفيق ليهم.

وعامة كل الكلاب عندها حس رعاية الأطفال، لكن في أنواع مميزة بتهتم جدا بالأطفال زي الجولدن ريتريفر و الجيرمن شيبرد، النوعين دول بالذات بيهتموا جدا بالأطفال بصورة فطرية وفيهم حاجة غريبه وهي انهم بدون تدريب بيقدروا يحددوا ايه الحاجات اللي بتأذي الطفل ويتفادوها، يعني صعب جدا تلاقي كلب جيرمن شيبرد بيلعب مع طفل بعنف، العكس هو الصحيح تلاقي الجيرمن بيلعب من الطفل بكل حنان وهدوء وكمان بيحافظ عليه من اي أخطار

وطبعا الناس اللي ربت عارفه الكلام ده كويس ومتأكده منه تماما، وزمان وانا طفل كان عندنا كلب جيرمن شيبرد ماما مكانتش بتآمن عليا غير وهو جنبي والكلب كان دايما واقف جنبي وهمه كله اني ماتخبطش في حاجة مثلا وانا ماشي ويفضل متابع حركاتي بكل هدوء وهمه كله هو سلامتي.