يا ترى ايه نيتك في ممارسة الرياضة واللياقة البدنية ؟

السلام عليكم

انا خطر على بالي سؤال وجيه جداً (مين وجيه ده
وحبيت اعرف اجابته من الناس كلها

وبما اننا في القسم الرياضي وتحديداً التخسيس واللياقة البدنية

تعالوا نسأل نفسنا احنا عازين نخس ليه ؟
احنا عايزين يبقى عندنا لياقة بدنية ليه ؟

ترد سوسو مني جيب وتقول ..
انا عايزة اخس عشان اغري الشباب بجسمي
(والله مرة شفت واحدة كاتبة كده في الهوايات بتاعتها

ويرد كابتن حمبوزو ويقول..
انا عايز يبقى عندي لياقة عشان لما انط عند بنت الجيران معملش صوت ومحدش يقفشني
(اشتغل حرامي احسن )


مممم يعني هي دي نوايانا ؟!
دي تبقى مشكلة بجد لو دي كانت النية

وبردوا عايز كل واحد يسأل نفسه

ليه وانا بخس وانا بلعب رياضة مخدش ثواب على لعبي ده ؟

هتقول لي اخد ثواب ازاي ؟

هقول لك تعدل نيتك وتخلص ليها

يعني ايه ؟

يعني سوسو تلعب رياضة وتوصل لجسم جميل رشيييق براحتها بس بلاش تمشي تغري الشباب بجسمها!

وحمبوزو يعمل العضلات اللي هو عايزها بس مش عشان ينط بيها عند بنت الجيران !

طيب ايه الفايدة ساعتها من الرياضة ؟


في فوايد كتيييييير جداً منها هنخدم نفسنا وهنخدم أهلنا وجيرنا وفوق ده وده هنطيع ربنا

هنطيع ربنا بالرياضة ؟!

ايوة طبعاً طالما النية لله

وازاي تكون النية لله ؟!

اقووووووول لك تعالى عد معايا


1- أنا بخس وأمارس رياضة علشان ارضى ربنا سبحانة وتعالى وأحافظ على الامانة اللى منحها لى ربنا وهو الجسد.

2- انا بخس وأمارس رياضة علشان يكون جسمي رشيق علشان انا مسلمة/مسلم ومش يتقال شوفوا المسلمين تخان وكسالى ازاى يبقى الامة فى ثبات عميق وكل مدى بتاخر النصر بسببنا احنا.

3- انا بخس وأمارس رياضة علشان اكون قدوة لغيري ومسلمة/مسلم ناجح قدرت انتصر على شهوة الطعام وشهوات الدنيا كلها.

4- انا بخس وأمارس رياضة علشان صحتى أولا علشان هكون زوجة/زوج فى يوم من الايام اسعد نفسى وزوجتي فى الحلال.

5- انا بخس وأمارس رياضة علشان اقدر انجب اولاد باذن الله بصحة جيدة واربيهم تربية سلمية اسلامية تحمل هم الدين.

6- لو متزوجة/متزوج علشان أعين زوجى على غض البصر واحفظ عينة على انها تقع فى الحرام بسببى.

7- علشان اقدر اتابع اولادى فى الحياة فى الدراسة وفى اللعب وفى الحركة الحياة اليومية عموما.

8- انا بخس وأمارس رياضة علشان أقدر البس ملابس أكثر حشمة ووقار للمرأة المسلمة مش علشان الممثلة الفلانية التى تكشف اكثر مما تستر.

9- انا بخس وأمارس رياضة علشان اقدر امتع نفسى والبس كل ما يحلو لى من قصير وعرى لزوجى حتى يرى ما تحلو لة عينه وفى الخارج اكون بحجابى وعباءتى.

10- انا بخس وأمارس رياضة واكل أكل صحى مفيد لجسمى بالبروتنيات والمعادن وغيرها لا للنشويات والدهون الضارة القاتلة.

12- انا بخس وأمارس رياضة علشان أقدر أفعل عبادات الله سبحانة وتعالى بصورة افضل زى الصلاة والصوم لانها عبادات بدنية.

13- انا بخس وأمارس رياضة علشان اكون اكثر نشاطا وحركة وأسعى فى الارض لخدمة الناس,,, لخدمة الاسلام والمسلمين.

14- انا بخس وأمارس رياضة وألعب رياضة لنصرة دينى ولنصرة رسولى صلى الله علية وسلم حتى يفرح بى يقوم القيامة لاني صاحبة/صاحب ارادة وتميز وعزيمة وقصة نجاح.

15- انا بخس وأمارس رياضة علشان ساكون اكثر سعادة وراحة بال وهاستمر طوال فترة رحلتى بالدعاء ثم الدعاء ثم الدعاء لان الدعاء هو سلاح المؤمن الذى نحارب بة عدونا وهو (((السمنة)))).

16- انا بخس وأمارس رياضة علشان ( ان الله لا يحب المسرفين) وعدم الاسراف اى الاكل والشرب.

17- انا بخس وأمارس رياضة علشان يكون بدنى قوى (فإن المؤمن القوى خير عند الله من المؤمن الضعيف).

18-انا بخس وأمارس رياضة لان كثرة الاكل تؤدى الى قسوة القلب والكسل فى العبادة.

19- انا بخس وأمارس رياضة وهوفر جزء من طعامى للفقراء والمساكين المحتاجين اللى مش لاققين ياكلوا اصلا وهتصدق بالطعام وأخذ أجر إطعام الطعام.

20 - انا بخس وأمارس رياضة علشان أهم نقطة ان سيأتى يوم وهأُسال عن كل شىء فى حياتى وعن جسدى وعن كل لقمة تدخل فمى حلال او حرام ....اسراف ام تبذير .....ضارة او نافعة .

21- انا بخس أمارس الرياضة حتى اكون على استعداد للتصدي لكل من يحاول التعدي على ديني ثم مالي وعرضي وأهلي.


ياريت كلنا نعدل نيتنا في ممارسة الرياضة
اي رياضة كانت

محدش هيخسر حاجة بالعكس هتكسب

التعب اللي انت بتتعبه في التمرين فرصة حقيقية

انك تاخد عليه اجر
عدل نيتك من دلوقتي