حرق العضلات

من طرف Mony khaled الثلاثاء يونيو 17, 2014 6:42 pm

سلامو عليكم Smile

انا عندي حوالي 24 سنة طولي حوالي 180 و وزني قبل ما ابدا نظام غذائي و جيم كان 85 و وزني المثالي لطولي اللي المفروض اوصله هو 77 كيلو ، دلوقتي بقالي حوالي 10 ايام ماشي علي :

1- نظام غذائي .

2- جيم .

3- حوالي ساعة كل يوم جري خفيف في مكاني اول ما اصحي قبل ما اكل اي حاجة يدوب بشرب كوباية مية (علشان احرق من الدهون الموجودة اصلا) .

4- حوالي نص ساعة عجلة كل يوم برده بس دي بتبقي بليل بعد الاكل يعني ب حوالي 4 ساعات .

5- عقلة و ضغط و رست في البيت كل يوم في اي وقت و بطن يوم و يوم بس طبعا في العقلة و الضغط ميت و علي ادي اما في البطن معقول الحمد لله .

6- بحرك جسمي عاما معظم الوقت علشان يحرق زيادة حتي لو هحرك رجلي كتير و انا بتفرج علي التليفزيون و الكلام ده طبعا مش بعمله بعد الاكل لمدة نص ساعة علشان الدم يبقي مركز احسن مع الهضم مش مع رجلي او باقي جسمي فاستفاد اكتر

----------------------------------------------------------

نظامي الغذائي

الفطــــــــــــــــــــار
نص كوباية دقيق شوفان + كوباية حليب خالي الدسم + معلقتين سكر + 1 بيضة كاملة + 2 بياض بيضة
-----------------------------------------------------
الغــــــــــــــــــــداء
صدر فرخة مشوية او سمك + سلطة
-----------------------------------------------------
العشــــــــــــــــــــاء
بما اني بروح الجيم بليل فبخلي وجبة العشاء هي هي وجبة بعد التمرين ( معلقتين جبنة قريش + خيارة + ربع كوباية لبن خالي الدسم + معلقة صغيرة عسل ابيض + ربع معلقة حبة البركة )
-----------------------------------------------------

بين الوجبات دي ممكن اكل فاكهة او خضار مش كتير يعني مثلا تفاحة و موزة في اليوم و بالنسبة للمية فبشرب حوالي 10 كوبايت مية ساقعة في اليوم بمعدل كوباية كل ساعة علشان مش عايز اشرب كتير مرة واحدة و اوسع حجم المعدة

انا عارف اني شادد شوية علي نفسي في النظام الغذائي بس انا عايز انزل الكام كيلو دول بسرعة و بعدها يبقي يحلها حلال

-----------------------------------------------------

انا النظام الغذائي اللي ماشي عليه بيديني حوالي 1000 سعرة حرارية في اليوم المفروض انا عايز اوصل للوزن المثالي بتاع طولي اللي هو هيبقي حوالي 77 كيلو ، انا في خلال ال10 ايام اللي بدات فيهم النظام الغذائي و الجيم و الكارديو نزلت حوالي 3 كيلو و في الغالب دول معظمهم مية من الجسم لاني مبطل الملح خالص و دلوقتي انا حوالي 81 كيلو يعني عايز انزل حوالي 4 كيلو كمان

انا نوعا ما في حرق الدهون شغال بس خوفــــــــــــــي الوحيد و سؤالي هو ازاي اخس الكام كيلو اللي ناقصني من غير ما احرق العضــــــــــــــلات خصوصا ان مشكلتي الاساسية هي اني مش عارف اكل ايه قبل التمرين و اكل ايه بعده و خصوصا بعده لاني بروح الجيم متاخر خالص و المفروض ان بيبقي قدامي حوالي نص ساعة علشان انام فببقي خايف اكل بعد التمرين علشان ما انمش و الاكل ده بسعراته الحرارية تتحول لدهون

فبقي عندي هوس من الاكل بعد التمرين لاحسن مجهود اليوم يروح علي الفاضي و بقيت اللي باكله بس زئي ما قولت فوق ( معلقتين جبنة قريش + خيارة + ربع كوباية لبن خالي الدسم + معلقة صغيرة عسل ابيض + ربع معلقة حبة البركة )

----------------------------------------------------------

مشكلتــــــــــــي : اني طلعلي كرش صغير بس كان طبعا فقيع في موضوع اللبس . و الحمد لله دلوقتي شبة بيختفي بس المشكلة الاساسية اني خايف احرق العضلات

هدفـــــــــــــــــي : اني انزل الكام كيلو اللي ناقصني و اشيل الكرش ده خالص و اعمل برده جسم موديل و فتنس عالـــــي ، انا الحمد لله لا تخين و لا رفيع و من قبل الجيم و النظام الغذائي و انا عندي نوعا ما عضلات لكن مشكلتي في الفتنس و القدرة علي التحمل و النفس .

سؤالـــــــــــــي : ازاي اخس الكام كيلو دول من غير ما احرق العضلات او بمعني اصح سوالي هو اكل ايه قبل التمرين و بعده بحيث اخس الكام كيلو دول و في نفس الوقت العضلات ما تتحرقش و طبعا بعيدا عن المكملات الغذائية و كدة لاني مش برتاحلها ؟؟؟