محتار فى حرق الدهون .. تعالى و من الاخر

بسم الله الرحمن الرحيم
والصلاة والسلام على أشرف المرسلين
سيدنا ونبينا وحبيبنا محمد
صلى الله عليه وسلم
وعلى الـ بيته وصحبه أجمعين
اللهم امين

...

حوار الدهون الكتير اللى على الجسم وطريقة حرقها مشكلة بتقابل شباب كتير فى مرحلة الكت

كل واحد بيبقى حاسس انه محتار .. أعمل إيه طب إيه النظام؟ وهكذا .. ..

إحنا هنحاول نوضح الدنيا فيها ايه وماشية ازاى وهنحاول نلم افكارنا ونعرف احنا بنعمل إيه وليه إن شاء الله ..
لانك لازم تكون فاهم اللى انت بتعمله





ويلا بينا نخش فى الموضوع


....

مقدمة خفيفة
..

أولا أى لاعب كمال أجسام بيمر بمرحلتين

أول مرحلة هى مرحلة البالك واكتساب الحجم العضلى








وفى المرحلة دى لاعب كمال الاجسام بيحاول يوصل لأكبر حجم يقدر يوصلو عن طريق أكل كميات كبيرة من البروتين والكارب بطىء الامتصاص " المعقد " .. وفى المرحلة دى بيكون غير مسموح للاعب كمال الاجسام انه يحس بالجوع من الاساس ... اول ما تجوع .. إضرب وجبة

....

المرحلة التانية وهى مرحلة الكت و تصفية الدهون






وفى المرحلة دى لاعب كمال الاجسام بيحاول يتخلص من اكبر قدر من الدهون اللى على جسمه مع المحافظة على أكبر كمية من العضل علشان التشريخ والرسم العضلى يظهر

وطبعا النظام بيختلف عن مرحلة البالك من حيث التمارين والأكل

ومرحلة الكت هى اساس موضوعنا

....

طيب نعمل كت ازاى ! .. ده بقى اساس الموضوع

علشان نقدر نحرق الدهون اللى على الجسم مع المحافظة على أكبر كمية من العضل

إتبع الخطوات الاتية

...

-1-الكارديو




تمارين الكارديو بتعتبر من غير جدال أفضل وسيلة للتخلص من الدهون إللى على الجسم .. حتى لو حضرتك عامل ريجيم .. عمرك ما هاتوصل لنتيجة مفيدة وفعالة من غير كارديو ..


- فى مرحلة الكت لازم نوصل الكارديو لأربع مرات اسبوعيا .. هنبدأ فى الاول تلت ساعه ومع التقدم نوصل الى ساعه الا ربع او ساعه
- لازم نقعد فترة كافية فى " منطقة حرق الدهون " اللى هى بتكون عبارة عن 65-70 % من الـ HeartRate بتاعك
طب نحسبه ازاى ده
بص يا سيدى وركز وهات ورقة وقلم لان الموضوع ده مذكور فى كذا موضوع هنا

عمرك - 220 = ناتج
تانى خطوة بقى نقسم الناتج ده على 0.65 والى هايطلع Your Heart Rate
" الاخ كفلت ذكر نظام الـ Hiit فى موضوع" إزاى تقسم بطنك " يا ريت نطلع عليه
............

2 - - كل وجبات خفيفة متعددة على مدار اليوم






دلوقتى العالم الغربى بدأ يتجه إلى النظام ده عموما انه بدل ما ياكل 3 وجبات يوميا .. لا يبقو مثلا 5 او 6 وتكون وجبات متوسطة الحجم .. وتقريبا فى الاصل شعب اسيا هو اللى بيعمل كده الصين واليابان وكوريا والعالم الخفيفه دى .. بياكلو كتير وبالرغم من كده حلوين ومقطقطين ..

ليه بقى الطريقة دى متبعه .. لان حضرتك اول ما بتاكل الوجبة .. الحرق فى الجسم بيتشغل .. فمع تعدد الوجبات .. معدل الحرق عندك هايزيد .. يعنى بدل ما احنا بنشغل الحرق 3 مرات فى اليوم .. لا احنا هانشغله 6 مرات و7 كمانعلى مدار اليوم .. يعنى جسمك شغال حرق الله ينور طول اليوم

علشان كده الناس تقول انا باكل وجبة واحدة فى اليوم ومش بخس .. ده لان حضرتك فيوز الحرق عندك صدى من الركنة .. وجسمك مابيحرقش وقافل على دهونك كوسيلة دفاعية تلقائيه من جسمك علشان يبقيك على قيد الحياة ..

...........

-3- إياك والاكل قبل النوم




حضرتك لما بتيجى تنام .. معدل الحرق عندك بيقل .. فلما انت تيجى تاكل كاربوهيدرات قبل النوم تتهضم .. وبعد ما تتهضم تمتص وطالما مافيش حرق يبقى هاتتخزن على هيئة دهون ومش هاتطلع على هيئة طاقة .. والمفروض اخر وجبة تكون قبل النوم بحوالى ساعتين او تلاتة

الحاجة الوحيدة الممكنة قبل النوم وبحذر كمان هو البروتين الصافى .. او باودر البروتين

.....

-4- إرفع معدل البروتين فى أكلك






لازم علشان تحافظ على الحجم العضلى المكتسب أثناء فترة الكت ... لازم تعلى كمية البروتين عندك .. ليييييييييييييييييييييييييييييييييييه ..؟

نقول ليه .. حضرتك لما تكون فى فترة الكت بيكون الكارب قليل عن فترة البالك وهى مصدر الطاقة الرئيسى .. لما الجسم بيلاقيها قليلة ... بنحول الحرق من الكاربوهيدرات الى الدهون المخزنة فى الجسم .. فلو كان كمية البروتين اللى داخلة الجسم قليلة ... هيبدأ الجسم ياخد البروتين من العضلة نفسها نتيجة لمعدل الهدم .. ولو كان فيه كمية بروتين كافية هيبدأ ياخد من الداخل وهايسيب العضلة فى حالها ونتجنب الهدم

نقطة تانية .. لو كمية الكارب اقل من اللازم .. هتخلى الجسم يحلل العضلة ويحولها لطاقة وتبقى العضلة فى خبر كان

....

-5- إديها مية تديك طراوة








طبعا كلنا عارفين اهية المية بالنسبة للإنسان لان وزن جسم الانسان 70 % والباقى صواميل ونشارة خشب وحبة جبس واسمنت

نقول بقى فوائد المية فى النقط التانية

أ - زيادة معدل المياه فى الجسم بتزيد من فاعلية الجسم ولانها ليها دور مهم فى العمليات الكيميائية اللى بتدور فى الجسم
ب- المية هى اللى بتوصل المواد الغذائة لكافة جسمك
ج- وبكده كل ما قللت الميه قللت تغذية الخلايا وكل ما زودتها زودت تغذية الخلايا
د- المية بتساعد جمسك انه يتخلص من الفضلات والسموم والبتكيريا " عرق وبول "


...

6 - -قلل من الكاربوهيدرات







المعادلة بسيطة .. الكاربوهيدرات هى مصدر الطاقة الاساسى

كل ماحرقت دهون .. وعوضت بكاربوهيدرات .. ولا اكننا بنعمل حاجة .. حلقة مفرغه وبنلف حوالين نفسنا

فلازم يكون الداخل للجسم من الكاربوهيدرات أقل من احتياج الجسم ليها علشان الجسم يحول مصدر طاقتة الى الدهون

ونصيحة مهمة

لازم تحاول تخلى الوجبات اللى فيها الكارب تكون فى الصباح او على الاقل مشبعد الساعه 6-8 مسائا علشان نكون استهكلناها وتجنبنا تخزينها على هيئة دهون بأقصى حد ونحول مصدر الطاقة الى الدهون بشكل احسن واسرع .
وإوعى تمنع الكاربوهيدرات نهائى

...

-7 - إياك والنقــنــقة والتسالى








طبعا هو مش كل التسالى مضرة بس أغلب الغالب فى التسالى مليانة بالدهون والزيوت والملح والعك والكل عارف .. ولو انت بتحس بالجوع ومش بتقدر تجهز الوجبات بتاعتك .. حاول تستخدم حاجات مفيدة بدل التسالى زى المكملات او البروتين بار بين الوجبات .

..

ونلخص اللى اتقال فى الاتى

علشان تتخلص من دهون جسمك فى فترة الكت وتعمل ديفينيشن وشكل حلو لجسمك اتبع الاتى :


أ- -وجبات خفيفة متعددة على مدار اليوم
ب- -على البروتين فى اكلك
ج- -قلل الكارب فى اكلك " إوعى تمنعه زى ما قولنا
-د- إيدها ميه تديك طراوة
ه- -بلاش كاربوهيدرات قبل النوم
-و- العب كارديو على 4 مرات على مدار الاسبوع
-ز- ماتعكش بين الوجبات
ح - - ناااااااااااااااااااااااااااااام على قد ما تقدر

..

وطبعا كل حاجة عاوزة مجهود وصبر .. الموضوع مش صعب .. بس مش سهل .. وكلنا عارفين إن الكت أصعب من الضخامة ..

وبالنسبة لأنظمة التدريب وقت الكات هانلاقى جداول فى المنتدى عنها

وربنا يوفقو يا شباب والله المستعان