تغذية الكلاب:-

من طرف 3amer الأحد يونيو 15, 2014 8:46 pm

في النقطه الخامسه يا شباب هتكلم عن تغذية الكلاب سواء كانت جراء أو كلاب بالغه، والموضوع ده له أهمية كبيره جدا لأن التغذية السليمة بتضمن لكلبك صحة كويسه وكمان بتزود من معدل العمر (طبعا الأعمار بيد الله سبحانه وتعالى لكن احنا بناخد بالاسباب). وموضوع التغذية هنقسمه ل 3 عناوين رئيسية:

1. معلومات عامة عن التغذية:
اضغط هنا لمشاهدة الصورة بالحجم الطبيعي.

طبعا لازم في الأول نفهم ان تغذية الجرو غير تغذية الكلب البالغ غير تغذية الكلب اللي بيتمرن تمارين رياضيه عنيفه، ده غير ان في انواع معينة من الكلاب ليها نظام مختلف في التغذية، ولازم قبل ما نفكر نعمل أكل للكلب نكون عارفين بالظبط الكلب بتاعنا ايه نظام تغذيته.
وفي 3 أنواع من الغذاء ممكن نعتمد عليهم:

الطعام الجاف (Dry Food):

وده عبارة عن مجموعة من الفيتامينات و الدهون و مسحوق العظام و اللحوم المجففه مضاف ليها معادن وكربوهيدرات و أملاح بنسب مدروسه صح، بتكون مخلوطه خلط جيد مع بعض ومجففه و على شكل كرات صغيره (زي البلي) أو مشكلة على شكل عظام صغيره جدا. والطعام الجاف ده مفيد جدا خاصة انه بيمنع زيادة الوزن وكمان بيقدم للكلب كل العناصر اللي ممكن يحتاجها وخاصة الأملاح لأن ناس كتير بتنسى اضافة الملح للطعام وده احيانا بيأدي ان الجرو وهو صغير ياكل برازه لتعويض الأملاح، وكمان الطعام الجاف مفيد لأسنان الكلاب من ناحية انه بيزيد من حدتها وبيقوي عضلات الفك، وكمان بيعمل على تنظيف الأسنان.
وعيب الطعام الجاف ان سعره مرتفع جدا، وأكتر نوع مشهور هو Nutro وكان سعره 300 جنيه للكيس ال 20 كيلو، بس في زميل لينا في المنتدى كان جاب رابط قبل كده من بيؤكد ان النوع ده بالذات بيجيب سرطانات وتسبب في موت كلاب كتير. وحاليا منظمه ال FDA معترضه عليه. وفي غيره طبعا أنواع كتيرأوي أغلبها موجود في كارفور و سبينز في القاهرة أو من المستورد في شارع فيصل في الجيزة.
الطعام الجاف في ناس كتير جدا بتفضل تعتمد عليه كغذاء أساسي للكلب بدون اي حاجة تانيه، لكن انا بصراحه ضد الموضوع ده لأنه بيحتوي على مواد حافظة و مكسبات طعم وكمان سعره مرتفع جدا، وغير كده انا باحب الكلب يعيش حياته طبيعي علشام ميفقدش اي حاجة من سماته اللي ربنا خلقها فيه.

الطعام المعلب المخصص للكلاب:

وده بردو بيكون عباره عن خليط من لحوم و عظام مطحونه و رز وفيتامينات و كربوهيدرات و أملاح ومكسبات طعم بس بيكون طعام معلب (زي البلوبيف) وبردو هو مفيد جدا لأنه مدروس بس انا بارفضه لارتفاع سعره ده غير ان ممكن الكلب يتعود عليه ويرفض اي طعام تاني غيره، وكمان لانه بيحتوي على مواد حافظة. لكن عامة ميزته هو الطعام المجفف انه مش محتاج اي تحضيرات وسهل جدا تقديمه ومش بيحتاج اي مجهود. علشان كده باكون مستعد بيهم هم الاتنين لان احيانا الواحد مش بيكون عنده وقت يعمل أكل للكلب.

الطعام المحضر في المنزل:

ده بقى المهم في الموضوع، طبعا لأن اغلبنا مادياتنا متسمحش اننا نصرف على أكل الكلب 400 جنيه في الشهر مثلا. والطعام المحضر في المنزل مميزاته انك بتكون عارف انت بتقدم ايه للكلب بالظبط وضامنه تماما، وكمان كل الأصناف بتكون طازجه ومفيش اي مواد حافظة ولا حاجة. وعامة تحضير الطعام للكلب في المنزل متعة لأنه بيقربك من الكلب و بيحس بيك وانت بتعمل له أكله وبيشم ريحته وهو بيستوي ودي بتزود الرابطه بينك وبينه لانه بيحس انك بتتعب علشانه وكمان بتعمل تشويق للكلب لما يفضل واقف جنبك مستني الطعام.

2. وجبات متنوعة للكلاب:

أنا هقسم هنا الوجبات زي ما قلت لإفطار و غداء وعشاء، لكن مواعيد التقديم وعدد الوجبات هتختلف حسب عمر الكلب و نوعه و الرياضه.