اهم اشاعات و افتكاسات و خرافات كمال الاجسام ( الجزء الثانى )

من طرف Mony khaled الثلاثاء يونيو 17, 2014 12:20 am

بسم الله الرحمن الرحيم

اخوانى اعضاء و زوار منتدى كمال الاجسام

الاشاعات مفيش اكثر منها و فى موضوعى الاول ذكرت اهمها و مع ذلك بتبقى الكثير و مهم ايضا

هستكمل باقى الموضوع اللى فات .. و اللى مقرأهوش او حابب يقراه تانى اللينك اهو

اهم اشاعات و افتكاسات و خرافات كمال الاجسام

اشاعات و افتكاسات و خرافات كمال الاجسام ( الجزء الثانى )

13- البنش المقلوب بيسببلك العمى يا عم ابعد عنه .. بلاها التمرين ده و فيه بدائل كتير

مبدئيا البنش المقلوب مبيسببش عمى .. ولا ضخ الدم بيزيد على العين ولا اى بتنجان من اللى بيتقال
ما الناس اللى بتعلب يوجا 24 ساعة واقفين على راسهم .. كان زمانهم كلهم اتعموا
و نفرض ان ضخ الدم بيزيد ( مع انه مش صح ) عايز تفهمنى ان3 مجاميع ولا حتى 4 .. فى عدات من 6 الى 12 اخرك هو ده اللى هيعملك عمى ؟
ال 20 ثانية او اقل بتوع التمرين فى المدة الضقيلة ديه شبكية العين هتنفجر ؟ مفيش اى ابحاث علمية بتقول الكلام ده

و اللى يقولك ده بدائله كتير مثلا و العب متوازى او ايا كان غيره من التمارين
البنش المقلوب ملوش بديل سواء بار او دمبل .. و لكن .. فيه تمارين تانية بتشغل البنش المقلوب معاها بس اكيد مش بنفس تركيز البار و الدمبل !!

الخطر الوحيد من البنش المقلوب هو ( اصابة مفصل الكتف ) و ده بيحدث امتى ؟ لما تشيل وزن تقيل و تلعب غلط
يعنى يا كوتش لو لعبت بوزن تقيل صح فيه اى خطر ؟ اكيد لا طبعا
زيه زى اى تمرين لو لعبت باوزان تقيلة غلط ممكن تمزق نفسك .. بس ده الخطر ازيد شوية

14- ابنى من فوق الاول و بعدين ابنى من تحت

اول ما تخش الجيم تلاقى الكابتن بنفسه و العيال القديمة الجتت بقى تقولك ( يا عم فكك من الرجل هتعوق تقدمك دلوقتى و كدة كدة مش باينة .. ابنى من فوق الاول اللى ظاهر قدامك و بعدين نبقى نرجع للرجل .. متخفش يا عم ديه بتطلع فى يوم و ليلة )

ابسط مثال: دلوقتى لو بتبنى عمارة .. هتبنيها من فوق لتحت ؟ ولا من تحت لفوق ؟
و لو بنيتها و تحت اساسها ضعيف .. هتقع ولا لأ ؟

نفس الكلام لاعب كمال الاجسام .. هتهمل رجلك انهاردة .. هتيجى بعد كدة مش هتعرف تضخمها و هتبقى ماشى برجل كتكوت و جسم بقرة من فوق .. و ناس كتير بتشتكى من انهم رجلهم مبتزدش علشان اهملوها فى الاول

و حاجة كمان .. الناصح اللى فاكر انه هيضخم من غير ما يلعب رجل .. انســــــــــى
رجل اللعب بيزود افراز الهرمونات بصورة اكبر من اى تمرينات تانية .. يعنى لو لعبت رجل هتزيد من فوق ؟ اه طبعا هتزيد
و لو اهملتها التقدم هيبقى بطىء جدا

15- العب بار فى بداية التمرين و خلص البنش العالى الاول و بعد كدة انقل على المسطح ....... الخ

مفيش قانون بيقول لازم تخلص جزء جزء من العضلة و الا كدة مش هتستفاد
انت ممكن تخلص جزء جزء .. ممكن تشكل تلعب حاجة من هنا على حاجة من هنا .. مثلا بار علوى و بعدين دمبل مسطح فى البنش
فى كلا الحالتين انت مستفيد
و لكن .. يفضل تلعب التمارين اللى بتحتاج مجهود اكثر فى الاول .. يعنى ايه يا كوتش ؟ يعنى متضيعليش وقتك فى لعب التفتيح و البول اوفر و تيجى فى الاخر تمسك بار تلاقى الطاقة خلصت !! خليك ناصح
ابتدى بالصعب فى الاول و امثلة للتمارين ديه ( عقلة ضهر .. بار فى الصدر .. بار امامى فى الكتف )

16- تمرين القرفصاء بيكبر المؤخرة و بيخلى شكلها وحش

ناس كتير بتتجنب السكوات ( القرفصاء ) عشان خايفة لا مؤخرتها تكبر .. مع انه افيد تمارين الرجل كلها
الحقيقة ان المؤخرة كبيرة ولا صغيرة .. ده راحع للجينات الوراثية و ليس تمرين القرفصاء
و مش عيب !! .. انت بتتولد بتلاقى نفسك كدة يبقى لازم تحب نفسك على كدة
فا ايا كانت جيناتك .. متحطش فى دماغك و خش تمرينتك عادى جدا
و لو السكوات هو اللى بيكبر المؤخرة .. يبقى الجلوس و الوقوف هو كمان بيكبرها ( بما انهم نفس الحركة )
تجنب الدهون الكثيرة فى تغذيتك و هى مش هتكبر .. و الكارديو ايضا مهم جدا فى الحالة ديه

17- الابطال اللى فى اعلانات المكملات بيستعملوها عشان كدة وصلوا للحجم ده و بيشيلوا اوزان تقيلة

اللى عاوز اوضحه ان الناس ديه بيجيبوها تعمل دعاية و خلاص و ياخدوا فلوس
يعنى مش معنى ان جاى كاتلر قال ان مثلا ( ان او اكسبلود ) رائع و بيخليه يشيل 500 كيلو نصدقه
الناس ديه عملت اجسامها بالمنشطات .. و التغذية السليمة .. و التدريب المستمر على مدار السنين
و ممكن اصلا تلاقيه مبيستعملش المكمل اللى عامل ليه اعلان

فا افضل طريقة انك تعرف المنتج ده كويس ولا لأ خد رأى الناس اللى اشترته او شوف مبيعاته و الريتنج بتاعه عامل ايه .. مبتصش لصورة الحيوان اللى شايل علبة المكمل هههههههه

18- لو بطلت تدريب عضلاتك هتتحول لدهون

اكبر خطأ ممكن الواحد يصدقه .. هو مش سحر .. مفيش حاجة اسمها العضلة هتتحول لدهون او العكس .. واحد تخين داخل الجيم يقولك انا هحول دهونى لعضلات

العضلة مكونة من خلايا حية فردية و بتمر على عمليات بنائية معقدة كثيرة
و خلايا الدهون بكل بساطة عبارة عن اكياس تخزين شحوم

مستحيل ديه تتحول ل ديه او العكس .. كأنك جايب كيلو حديد و عمال تعمل عليه تعاويز عشان تحوله لدهب

لما تبطل تمرين العضلة بتتأقلم مع الظروف الجديدة و المحهود الجديد بالتالى بتنكمش
و كمان لو المجهود قل بصورة جامدة خالص .. العضلة بتنكمش اسرع مع الحلد اللى حواليها بالتالى بتلاقى عندك ترهلات

انت بتلاقى دهون بعد ما تبطل تمرين لأن اكلك زى ما هو و المفروض كنت تقلله على حسب المجهود الجديد .. بالتالى اى سعرات زيادة بتتخزن فى صورة دهون فورا و الحرق عندك بيقل

19- لو ريحت اسبوع كل اللى عملته ضاع على الفاضى

ده العكس هو اللى صحيح .. لو ريحت اسبوع هتستفيد اكثر
المفروض اصلا بعد كل جدول جديد ( شهرين او 3 شهور ) تاخد اسبوع راحة ..
اثناء الاسبوع ده لو عندك اى بداية لاصابات هتلحق تخف .. و بالتالى العضلة تستريح شوية و اول ما ترجع تكون متحمس للجيم و تلاقى نفسك بتشيل اوزان اتقل من العادى كمان

20- العضلات بتقلل سرعتك و مرونة جسمك

برده كلام حاطىء و العكس هو اللى صحيح

الدراسات اثبتت ان العضلة القوية بتنقبض و تنبسط اسرع من الضعيفة و ايضا بتدى طاقة اكثر
بالتالى السرعة هتزيد مش هتقل .. بدليل كل العدائيين ( الناس اللى بتجرى للتوضيح ههههه ) هتلاقى كلهم عضلات

و بخصوص المرونة .. الكلام صحيح لو حضرتك شايللى وزن تقيل و بتعملى نص عدة و الحركة مش كاملة .. اكيد المرونة هتلقة
بس لو بتعمل الحركة كاملة و صحيحة و بتفرد العضلة و تتنيها للاخر ايا كان الوزن اللى شايله .. ده عمره ما هيأثر على مرونتك بالسلب
بالعكس .. المرونة عندك هتزيد
و يفضل لو مضطر تلعب بوزن تقيل و الحركة مش كاملة .. لما تخلص التمرين تعمل اطالات للعضلة عشان ميأثرش على مرونتك

21- اتمرن بطن كتير عشان تقلل حجمها و تحرق الدهون و تتقسم و يبقى شكلها حلو

الحقيقة المرة ان ( البطن عضلة زيها زى غيرها ) يعنى لو كل يوم اتمرنت عليها .. مش هتقل خالص .. بالعكس ده يا اما هتضعف و تفضل سايبة زى ما هى يا اما هتزيد معاك
و تمرين البطن ملوش علاقة بحرق الدهون .. حرق الدهون ده عن طريق الكارديو و ايضا عن طريق التغذية
يعنى لازم تقلل سعراتك الحرارية اقل من اللى بتحرقه عشان تقلل حجم البطن او اي عضلة غيرها

22- ممكن تضخم و تحرق دهون فى نفس الوقت

الكلام مش صح .. و لكن اللى ممكن يعمل كدة ( واحد عنده سوبر جينات وراثية ) تلاقيه بيحرق الدهون و عضلاته بتزيد فى نفس الوقت .. و نادرا لما تلاقى حد من الناس ديه .. و كمان بيبقوا شغالين منشطات

لاغب كمال الاجسام الطبيعى ( مش سوبر مان ) لازم يضخم لحد مرحلة معينة و بعدين يبدأ يحرق دهونه لحد ام يوصل للنسبة اللى عاوزها و هكذا .. ( مرحلة البلك و الكت )

23- كل ما تعرق اكثر .. كل ما تحرق دهون اكثر

ياما سمعنا الكلام ده .. و تلاقى اللى لابسلى كيس بلاستيك و جايلى الجيم فاكر نفسه نيل ارمسترونج و هيمشى على القمر

نفصص الكلام حاجة حاجة .. العرق ناتج عن ايه ؟ .. العرق ده فقدان مياه .. و كل واحد و طبيعة جسمه
فيه اللى علطول بيحرق و حران صيف و شتاء .. و فيه اللى لو قعد يجرى شهرين مش هينزل نقطة
و حسب الجو ايه نظامه .. و التهوية و الهدوم اللى لابسها ..... الخ

و نيجى لحرق الدهون .. دلوقتى لو عاوز ( تقلل وزنك ) مش مشكلة .. البس يا عم الكيس البلاستيك و اتنطط زى القرد و انت تقل فى الوزن .. بس قليت ايه ؟ هو ده السؤال .. قليت مياه يا معلم .. يعنى بمجرد انك تشرب كوبايتين مياه تانى كل ده هيرجع
العرق مش دليل على حرق الدهون .. حرق الدهون عن طريقة الكارديو و قلت كتير قبل كدة

24- مفيش الم .. مفيش زيادة عضلية .. No Pain No Gain

مثل معروف اوى فى جميع انحاء العالم .. ناس كتير فاكرة انه لو مخرجتش من التمرين مكسر و جسمك كله واجعك يبقى كدة مجهودك راح على الفاضى و مفيش نتيجة من اللى عملته و لازم المرة الجاية تشد على نفسك شوية

الحقيقة ان الالم ملوش علاقة بنمو العضلة او لأ .. طبيعى لو لسة مبتدىء فى اول اسبوع بيبقى فيه الم فى العضلة و بعد كدة الجسم بيتأقلم عللى بتعمله و الألم بيقل و الى حد ما بيختفى
و بعد كدة احيانا لما بتلعب تمرينة جديدة او بتشد على نفسك شوية فى التمرين العضلة بتوجعك يومين بعديها ولا حاجة وجع بسيط جدا و ده طبيعى

لكن لو الوجع جامد .. ده بقى اللى مش طبيعى و سعادتك على وشك اصابة و ده معناه انك بتتمرن غلط مش صح علشان كدة فيه وجع بالتالى تتأكد من كل التمارين اللى بتعملها عشان متضرش نفسك

25- اعمل كارديو لما تكون عاوز تحرق دهون بس

يا سلام على الحكم .. على اساس ان فائدة الكارديو ( التمرينات الهوائية ) الوحيدة انه يحرق الدهون ؟
الفرق الوحيد بين الكارديو فى مرحلة الكت اللى هى حرق الدهون و مرحلة البلك اللى هى الضخامة انه فى الكت هيبقى مرات اكثر و قوته عالية
ده غير طبعا نظامك فى التغذية و سعراتك اللى بتاكلها و على اساسها بتحدد انت عاوز ايه

الكارديو فوائده كتير و منها انه بيقوى عضلة القلب و الرئة و بالتالى بتحسن التنفس عندك و حرق الاكسجين و بيقلل من خطر الاصابة بأمراض القلب و الضغط

26- اسمع جسمك بيقولك تتمرن ايه

مقولة حلوة جدا والله .. كل واحد المفروض يعرف جسمه عاوز منه ايه .. كلام صحيح 100 %
بس الناس وخداه بمفهوم خاطىء
مثال بسيط .. واحد مخترع جديد عاوز يكتشف الجاذبية الارضية .. و هما مكتشفينها من تماناشر الف سنة هههههههه

يعنى ايه الكلام ده ؟ يعنى لما واحد مستنى جسمه يقوله العب ب 50 كيلو و 8 عدات احسن .. ولا العب 40 كيلو و 12 عدة ؟
ده اللى مينفعش تعمله
دلوقتى انت بتجرب فى حاجات العلم خلاص اثبتها من زمان .. العلم قال انه كل ما يتقدم مستواك فى التدريب كل ما العضلة هتكبر اكثر .. سواء كان عن طريقة تمرينات جديدة او اوزان اتقل او اسلوب جديد او غيره
ديه مش حاجة انت محتاج تكتشفها و بالتالى تقعد تجرب على نفسك لحد ما توصل لنفس النتيجة اللى العلم اثبتها

27- جوع نفسك و كل تفاحة و خيارة فى اليوم و انت تحرق الدهون

والله حضرتك لما تجوع نفسك هتخس فى الوزن اه .. بس هيبقى كله عضلات لان جسمك علشان ميغماش عليك من قلة الاكل محتاج اى مصدر للطاقة و مفيش اسهل من تكسير بروتين العضلة
و مجرد انك ترجع لاكلك الطبيعى هتزيد دهون بالعبيط .. لان الميتابوليزم ( حالة حرق السعرات ) فى جسمك ضعفت و بقت بطيئة
و جسمك هيحزن دهون علشان لو حضرتك ناويت تمنع الاكل تانى يلاقى حاجة ياخد منها سعرات

28- اوعى تاكل صفار البيض ده مضر جدا

تخش الجيم تلاقى اتخن تخين ماسكك من قفاك و بيقولك ( كخ يا بابا .. كخ يا حبيبى .. اوعى تاكل الصفار ده وحش ياى متقربش منه ) و اللى متعرفوش بقى ان فيتامينات البيضة a, d, e موجودين فى الصفار
ده غير الحديد و المنجنيز و الكالسيوم و الفسفور اللى بنسبة اكبر من بياض البيض

السبب الوحيد اللى بيخلى الناس ترمى صفار البيض هو نسبة الكوليسترول العالية اللى فيه
و مع ذلك الدراسات اثبتت ان الجسم مش بيتمص النسبة العالية ديه كاملة بالتالى مفيش مشكلة منه !!
و مش 3 بيضات ولا 6 فى اليوم هما اللى هيقتلوك و يعملولك تصلب شرايين

29- متاكلش قبل ما تنام بدل ما تتخن و تبقى زى العجل

برده ناس كتير بتقولك تجنب الوجبات التقيلة قبل النوم .. و اللى يقولك ( بعد الساعة 8 بالليل متاكش حاجة ) و منهم دكاترة .. اخر تخلف يعنى .. و الحجة انك و انت نايم مبتحرقش سعرات حرارية

الحقيقة انك بتحرق سعرات حرارية على مدار 8 ساعات النوم اكثر من السعرات اللى بتحرقها و انت قاعد 3 ساعات
يعنى انت عاوز تمنع الاكل و انت نايم و جسمك محتاج اى عنصر غذائى عشان يساعد فى استشفاء عضلتك و تصحى فايق .. و مش عاوز تمنعه و انت قاعدلى بتتفرج على فيلم مثلا ؟ ايه النصاحة ديه

سعراتك الحرارية هتقسمها على مدار اليوم بنسب متساوية .. تاكل بالليل .. الصبح .. بعد الضهر .. انت حر
ده فيه ناس متقدمة بيصحوا من النوم بالليل عشان ياكول و يرجعوا يناموا تانى .. ده يبين اهمية الاكل بالليل

30- عاوز معلومة صح .. اسأل الواد الجتة اللى هناك ده

اخر اشاعة و اهم واحدة فيهم نظرا للمعتقدات اللى الناس كلها فكراها ان ( اى حد جسمه حلو و متقسم و معاه بطولات او لأ .. يبقى ده اوتوماتيك يخليه خبرة و جامد .. و اى حد جسمه طبيعى و بسيط .. يقولك ده ولا ليه فى الكوسة )

اللى انت متعرفوش .. الناس الجتت و اللى تلاقى دراعه 50 سم و متقسم و متشرخ .. ده بيبقى بالوراثة
و اللى ضهره عريض .. و اللى صدره اكبر من واحد بيلعب بقاله 10 سنين .. كل الكلام ده وراثة
و هو زوده بالتغذية و التمرين .. و حبة منشطات تنفخه زيادة
و تروح تسأله بقى على انه الواد الفاهم ابو معلومات جامدة
و للاسف . تلاقيه هو نفسه مش عارف وصل للحاجة ديه ازاى

يا اما راح للكابتن بتاعه و هو اللى خلاه يلعب .. يا اما زى الحمار قعد يعمل اى حاجة و باللى بيضربه جسمه زاد و فرحان بنفسه

الخبرة مش بالشكل .. و لو كانت بالشكل يبقى ليه كباتن الجيم ( بما ان عندهم معلومات ) بيضربوا منشطات على الفاضى و المليان و هما اصلا مبيخشوش بطولات و نافخ نفسه على الفاضى ؟ معظمهم طبعا فيه ناس محترمة و فاهمة

ليه لما بتروح لكابتن الجيم بتاعك بيدخلك تمرينة 3 ساعات و يقولك كدة مفيد ؟ ( اهو مش فاهم اصلا مفيد ليه و ازاى .. جاب شهادة و خلاص و فتح جيم علشان ياكل عيش )

لو الخبرة بالشكل .. كان كل واحد ضربله كورس ديكا و تستو على كام حباية انابول بقى مدرب منتخب مصر

و كدة يكون الموضوع خلص و اتمنى انه ينال اعجابكم و اتمنى انى اكون افاتدكم

و بالتوفيق للجميع