هل انت فعلا محتاج كل كمية البروتين دي ........... ادخل أقرا ووفر فلوسك.

من طرف Mony khaled الثلاثاء يونيو 17, 2014 12:35 am

دايما بنسمع ان عشان تزود بناء العضلات لازم تاكل كمية بروتين عالية في الدايت بتاعك و ناس قالت ان لازم كمية البروتين تكون 2.2-2.5 جرام لكل كيلو جرام من وزن الجسم يعني لو واحد في المتوسط وزنه 85 كيلو يعني المفروض ياكل في اليوم من حوالي 190-215 جرام بروتين تقريبا.

طبعا كمية كبيرة جدا و مرهقة ماديا و معنويا انك تقعد تاكل كل الكمية دي كل يوم, و هتلاقي ان السعرات بتاعة البروتين بس ممكن توصل لحد 2000 كالوري في اليوم و ده طبعا من غير الكارب و الدهون.

كدة لو حضرتك بتعمل كت هتلاقي الدنيا باظت الا لو انت بتعرف تعمل كت على سعرات عالية و عندك ميتابوليزم عالي و غير كدة هيكون صعب انك تحضر كمية الاكل دي و تاكلها كل يوم مع الشغل و المسئوليات اللي على الواحد ...... طيب ايه الحل؟؟؟؟؟

شركات المكملات ظهرت بالحل و في رأي الشخصي ان الشركات دي هي اللي مولت الدراسات اللي بتقترح نسبة البروتين العالية دي في الدايت و جابتلنا البروتين بودر.

هل انت فعلا محتاج كل كمية البروتين دي ........... ادخل أقرا ووفر فلوسك. Protein-powder

البروتين بودر ظهر و كأنه الحل السحري. نسبة يروتين عالية, سعرات اقل, بروتين نقي من غير أي حاجة تانية , اسهل في التحضير و التناول و أرخص في السعر ( و ده طبعا بره مش عندنا) .............. هاه نفسك في حاجة تاني ؟؟؟؟

طيب لو جينا نبص على احتياج البروتين اليومي مع اعتبار السن و ال(عفوا كلمة ممنوعة) زي ماهو موجود في الجدول ده <1>

هل انت فعلا محتاج كل كمية البروتين دي ........... ادخل أقرا ووفر فلوسك. Unle54d

هنلاقي ان متوسط احتياج البروتين اليومي للذكور من سن 14-30 سنة هو من 52-65 جرام في اليوم الواحد

طيب و بالنسبة للرياضيين ........... المفروض بقى ياخدوا بروتين اكتر مش كدة ولا ايه ؟؟!!

ايوه صح الطبيعي ان الرياضيين بيكون عندهم فقد اكبر في البروتين و هتحتاج بروتين أكتر بس مش بالكميات الجبارة اللي احنا بنتكلم عليها و في دراسات اقترحت ان 1.2 -1.4 هو الاحتياج المثالي للبروتين يوميا بالنسبة للرياضيين عشان يحققو اكبر نتايج.

فعلا ؟؟!! طيب تعالى كدة نشوف الدراسة دي ....... <2>

اتعملت دراسة على 3 مجموعات من الرياضيين,

مجموعة بتاخد كمية بروتين قليلة (0.86 جرام لكل كيلو جرام في اليوم)

مجموعة بتاخد كمية بروتين متوسطة (1.4 جرام لكل كيلو جرام في اليوم)

مجموعة بتاخد كمية بروتين عالية (2.4 جرام لكل كيلو جرام في اليوم)

و مع تثبيت نظام التدريب لل 3 مجموعات لقو ان مفيش فرق في الزيادة العضلية للمجموعة اللي بتاخد كمية متوسطة عن اللي بتاخد كمية عالية, يعني اللي اخد 1.4 زي اللي اخد 2.4

طيب كدة عرفنا ان مش شرط تاخد كمية بروتين عالية جدا عشان تعمل تبني عضلاات اسرع و أكبر ....... تمام كدة ؟؟

طيب ايه المشكلة لو أخدت كمية عالية زي دي من البروتين, هل ممكن يكون فيه ضرر؟؟

ايوه هيكون فيه ضرر ...

اول ضرر انك هتكون بترمي فلوسك في الارض و مش بتستفيد من كمية البروتين العالية جدا اللي انت بتاخدها.

تاني حاجة كمية البروتين العالية لما بيحصلها ميتابوليزم بتطلع كمية يوريا برضه عالية و دي بتعمل ارهاق و اوفر لود على الكلي عشان تتخلص منها.

كمان الجسم عشان يتخلص من اليوريا بيستخدم كمية مياه كبير و مع اعتبار ان الرياضي بيفقد كمية مياه كبيرة اثناء العرق في التمرين ممكن الجسم يدخل في حاجة جفاف و بيزيد الاحتمال ده خصوصا ان ناس كتير مش بتهتم بشرب المياه و السوائل.

اثناء الميتابوليزم بتاع البروتين الجسم بيستهلك كمية كبيرة من الكالسيوم اللي بيتاخد من العضم لو انت مش بتاخد كمية كالسيوم مناسبة و ده يعرضك لهشاشة العظام و الكسور.

الخلاصة:

انت مش محتاج كمية بروتين كبيرة جدا عشان تبني عضلات اكبر أو اسرع

كمية متوسطة من البروتين كافية جدا

كمية البروتين العالية ليها اضرار على الجسم

وفر فلوسك احسن

مثال على الاحتياج اليومي من البروتين:

لنفترض شخص رياضي وزنه 85 كيلو جرام هيكون احتياجه من البروتين (85*1.4 ) = 119 جرام بروتين يوميا

يعني ممكن تاخد:

علبة تونا (42.5 جرام بروتين) + 250 جرام صدور فراخ(77.5) = 120

او

6 بياض بيض(21.6) + 200 جرام جبنة قريش (42.5) + 3 كوب لبن منزوع الدسم (19. Cool

+ علبة تونا (42.5) = 126.4

دي مجرد امثلة لتوضيح سهولة ادراج البروتين في الدايت .

ملحوظة:

لو سمحتم اللي يحب ينقل الموضوع يستأذن أو على الاقل يذكر المصدر, انا تعبت في تجميع المعلومات و مينفعش حد يجي ياخد الموضوع على الجاهز و ينسبه لنفسه