تعرفوا ايه عن الوحدة ؟ موضوع شيق

من طرف **Asmer** الأحد مايو 28, 2017 9:56 pm

وكلنا ماسكين موبايلاتنا وقاعدين اللي فاتح فيسبوك واللي فاتح تويتر واللي بيتشات عالواتساب ومرة واحدة صاحبنا حط موبايله عالترابيزة ورمى سؤال كده "تعرفوا ايه عن الوحدة؟"

تنحنا كلنا وبصينا لبعض، كنا مستغربين السؤال ده ومش فاهمين ايه لازمته بس كل واحد راح بدماغه ف عالمه الخاص ومابقيناش مركزين خالص، كلنا اه على نفس الترابيزة بس كل واحد فينا ف عالم مختلف عن التاني..

فضلنا ييجي ربع ساعة ساكتين واحنا مش متعودين على ده، قطعت حبل افكارهم وقولت "الوحدة احنا" كلهم بصولي باهتمام وهو رد عليا وقال "ازاي؟" كلهم لفوا كراسيهم ناحيتي وحطوا ايدهم على خدهم ودي يمكن كانت اول مرة اقول رأيي ف حاجة ويمكن ده اللي خلاهم يركزوا معايا..

المهم، قولت لنفسي لازم اتكلم بصوت عالي نسبيا وبدأت أتكلم وأقول..

"الوحدة احنا عشان احنا اللي بنحسسها لبعض واحنا كلنا بنكرهها.."

ببص حواليا لاقيت كل اللي موجودين سكتوا وبيبصولي، ارتبكت شوية، لا كتير الحقيقة وبدأ وشي يحمر وبدأت ايدي تعرق وبصيت للسما وغمضت عيني وبعدين وقفت وكملت كلام وانا بمشي وسطهم، اللي اعرفهم واللي ماعرفهمش، لحد دلوقتي معرفش الجرأة دي جاتلي ازاي بس اهي حصلت يعني، المهم..

قولتلهم "مين هنا مبسوط وفرحان وحاسس انه له صحاب جدعان معاه دايما أو له حد سند ليه او اهل بيقدروه ويحترموا حريته الشخصية؟" لاقيت بنت و ولد من على تربيزة قدامي رفعوا ايديهم، فهمت طبعا انهم مرتبطين، روحتلهم وقولتلهم "بتحبوا بعض ليه؟" بصتلي واتكسفت راح هو قال بهدوء عجبني "عشان لاقيت نفسي فيها" بصيت حواليا وقولت " اهو شوفتوا؟ لقى نفسه فيها وده اللي احنا محتاجينه عشان مانحسش اننا لوحدنا، محتاجين نلاقي نفسنا، ومش شرط نلاقيها ف حد على فكرة، ممكن نلاقيها ف مكان بنرتاح فيه وممكن ف شغل حابينه وممكن ف هواية بتفرحنا، في حاجات كتير ممكن تلاقي نفسك فيها بس احنا مابنتعبش نفسنا وندور، عايزين كل حاجة تجيلنا عالجاهز واحنا حاطين رجل على رجل، حتى الحب والونس، مابنتعبش عشان نلاقيهم!

تفتكروا زمان كان ايه اللي بيخلي الحب يكمل؟ وليه دلوقتي بقى من الصعوبات اللي بتواجهنا اننا نقدر نحافظ على حبنا ونخليه يكمل؟" بصوا لبعض و راح القهوجي ابتسم وقال "عشان زمان كان كل حاجة صعبة، كنت بحب واحدة وكنت بتمنى اشوفها كل شهر لما تيجي عند الترزي اللي تحت بيتي، دلوقتي انتوا بتشوفوا بعض كل يوم، حلاوة الحب كانت ف صعوبته ومن كتر مانتوا مسهلين كل حاجة مابقاش له معنى" قولتله "ده اللي بتكلم فيه، وكمان بصوا احنا قاعدين جنب بعض ف الصور لكن فالحقيقة كل واحد مع موبايله، مابقاش لها لازمة قعدتنا دي، ممكن نخلي علاقتنا فيسبوكية بقى بس ماهو الناس اللي ورا الشاشة دول بقوا اهم ماللي معانا وشايفينهم، احنا مزيفين، حبنا بقى مزيف، ضحكنا مزيف، ونسنا مزيف، حتى عياطنا بقى مزيف، حبنا للموبايل خلانا ننسى اللي حوالينا، خلانا نعتقد اننا لوحدنا، مع اننا لو قفلنا الموبايل واتكلمنا مع بعض هنحل كل مشاكلنا وكل حاجة هتبقى تمام" وقف واحد وقال "صح جدا الكلام ده، بس انا اهو اوقات كتير بسيب الموبايل وبرضه لوحدي" رديت "يمكن ماركزتش حواليك ولاقيت اللي انت عايزه، اللي هو اصلا مستنيك" قعدت مكاني ومسكت الموبايل ورفعته وقولت "اللي احنا فيه بسبب حتة الحديدة دي؟ طب انا وعد مني اني كل ما انزل معاكوا هقفله" راح كذا حد قال وانا كمان لاقينا القهوجي جاي يقول بصوت عالي "لقد قررنا نحن مجلس ادارة القهوة مفيش حد يفتح موبايله وهو قاعد هنا واقعدوا اتكلموا واستمتعوا بحياتكوا قبل ما العمر يجري والوقت يسرقكوا وتلاقوا نفسكوا مش فاضيين تقعدوا قعدة زي دي لمدة 5 دقايق حتى، استمتعوا بصحوبيتكوا وخليكوا ف ضهر بعض عشان انتوا محتاجين بعض" كلنا صقفناله وضحكنا وكل صحاب قاعدين على تربيزة بقوا يبصوا لبعض ويضحكوا ويقولوا صح صح، وراح صاحبنا بصلي وبصوت واطي قال لي "طب تعرفوا ايه عن ربنا" ابتسمت وقولت "لا احنا محتاجين قعدة من اول اليوم عشان نتكلم فالموضوع ده" وكلنا ضحكنا ولآخر اليوم كنا بنتكلم ومحدش جه جنب موبايله ولأول مرة نروح مبسوطين كده..

بس طول السكة ساكتين وكل واحد بيفكر ف "نعرف ايه عن ربنا؟".